snorraspjall

Jón Arnór vs. Finland

2006-09-19T17:05:00.000Z

Jón Arnór vs. Finland
Originally uploaded by snorriorn76.

Jón Arnór að leggja boltann í körfuna gegn Finnum í Laugardalshöll 6. september 2006.

Nú er ég búinn að fá mér flickr account, http://flickr.com/photos/snorriorn, ótrúlega sniðugt. Hægt að senda myndir af flickr yfir á blogsíðuna sína (sem ég nota nú ekki mikið fyrir þá sem ekki hafa tekið eftir því ;))

Áramót 04-05

2006-05-21T01:14:00.000Z

Þessi mynd er tekin um áramóti 2004-2005 af Theu frænku minni. Hún, Chanel systir hennar og Bjarki Fannar fóru út að gera skotpall fyrir rakettur. Ég var úti með myndavélina að fylgjast með þeim, í þeirri von að ná einhverjum góðum myndum. Thea var eitthvað ósátt við það og setti upp þennan myndarsvip, en þess ber að geta að Thea (sem er árinu eldri en Bjarki), er mikill prakkari.

Myndin er tekin á Powershot S50 vélina mína, sem ég er búinn að eiga núna í 2 ár. Það fer að líða að því að maður endurnýji græjuna.

Þrítugi kallinn

2006-05-17T08:58:00.000Z

Þessi mynd er tekin 9. maí síðastliðinn, á afmælisdaginn minn. Ég hélt þá smávægis grillveislu á Gufunesbæjarlóðinni. Þarna stend ég við grillið ásamt Bjarka, sem vildi ólmur aðstoða við allt sem við kom grillinu. Myndin er tekin á Canon EOS 350D með kit linsunni (18-55mm).

Tivoli

2006-05-15T00:00:00.000Z

Hver elskar ekki Tivoli? Þessi er tekin fyrir utan Tivoli í ágúst í fyrra (2005) á Canon Powershot S50 vélina mína. Fínasta vél sem hefur skilað mér mörgum fínum myndum.

NM 2004

2006-05-12T10:43:00.000Z

Þessi mynd er tekin eftir Norðurlandamót yngri landsliða í körfubolta í maí 2004. Þá höfðu þrjú af fjórum íslensku liðanna unnið norðurlandatitil og ákváðu margir leikmenn að fagna með því að fara í sturtu í búningunum. Myndin er tekin á Canon Powershot G2, vél sem pabbi átti og á líklegast enn.

Mynd af Bjarka Fannari

2006-05-11T22:03:00.000Z

Ætla í nánustu framtíð aðallega að pósta myndum hér inn, hugsanlega smá texta með myndinni ef það er viðeigandi auk upplýsinga um hvernig myndin var tekin.

Myndin er tekin á Canon 350D. Linsa 85mm f. 1.8 USM. Ljósop 1.8, hraði 1/50, ISO 400. Myndina tók ég þegar ég var að prófa þessa linsu í fyrsta skipti.

Fréttir

2006-03-31T09:44:00.000Z

Þessi var að vinna hjá mér í Bónusvídeó á sínum tíma. Góð stelpa.

Svo eru fréttir, þið megið giska...

Zniðugt

2006-03-12T23:25:00.000Z

Verð bara að posta þessari mynd. Ég ætla samt ekki að byrja að blogga aftur, enn sem komið er.

Strákarnir eru þarna að fagna körfu í leik á Samkaupsmótinu. Bjarki Fannar er lengst til hægri, en með honum á myndinni er þrír liðsfélagar hans. Í bakgrunni sjást gríðarleg vonbrigði eins leikmanns andstæðinganna, en hann felur andlit sitt í höndum sér. Skemmtilegt Kódakmóment!

Hættur...for now

2006-02-24T22:36:00.000Z

Ég er hættur að blogga...að sinni minnsta kosti. Ég nenni ekki að standa í blogginu, því mér hefur gengið skelfilega til að fá sjálfan mig til að setjast niður og skrifa eitthvað sniðugt/fyndið/almennilegt/áhugavert undanfarið. Það er þó aldrei að vita nema maður byrji aftur.

Góðar stundir

Viðbót við klukk

2006-02-20T12:12:00.000Z

Langar að bæta við einum flokk í klukkið.

4 geisladiskar sem ég get hlustað á aftur og aftur og aftur
Pearl Jam - Ten
Red Hot Chilli Peppers - Blood Sugar Sex Magic
Radiohead - The Bends
Coldplay - A Rush Of Blood To The Head

Klukk

2006-02-18T10:51:00.000Z

Sigurgeir klukkaði mig, og þar sem ég er veikgeðja þá tek ég þátt. Mér þótt þetta líka bara nokkuð gaman, held nú samt að það komi ekkert á óvart í þessum lista.

4 störf sem ég hef unnið við
Verkstjóri í unglingavinnunni
Vagnstjóri hjá Strætó
Verkstjóri á húsgagnalager Pennanns
Rekstrarstjóri hjá ÍTR

4 kvikmyndir sem ég get horft á aftur og aftur
LOTR allar
Life of Brian
Monty Python and the Holy Grail
Fargo

4 staðir sem ég hef búið á
Reykás 1
Vallarás 4
Hábær 28
Hraunbær 188

4 sjónvarpsþættir sem mér líkar
Prison Break
Lost
My Name Is Earl
House

4 staðir sem ég hef heimsótt í fríum
Tæland
Nýja Sjáland
Singapore
Bandaríkin

4 síður á netinu sem ég heimsæki daglega (fyrir utan blogg)
www.mbl.is
www.karfan.is
www.kki.is
www.liverpool.is

4 matarkyns sem ég held uppá:
Lambalæri ala pabbi
Grillaðar kjúklingabringur
Bláberja skyr.is drykkurinn
Heimalöguð pizza

4 bækur sem ég les oft:
The smart take from the strong
Kafteinn Ofurbrók
Leikni framar líkamsburðum
Myndasögusyrpur

4 staðir sem ég mundi frekar vilja vera á núna
Uppi í rúmi að sofa
Að þjálfa áhugasama körfuboltamenn
Á toppslag í NCAA1 háskóladeildinni
Að slappa af í sólinni á Bali

4 bloggarar sem ég klukka
Birkir
Ragga
Gunnar Freyr
...hef ekki fjórða bloggarann til að klukka!

Kannski af tilefni síðustu setningarinnar í klukkinu, ef ég þekki þig og þú ert með blogg sem er ekki linkað á hérna hægra megin, þá máttu láta mig vita!

Skyldurækni

2006-01-27T00:08:00.000Z

Stundum verður maður bara að blogga, hér koma nokkrar myndir. Ef þið hafið gaman af myndum, þá segi ég bara enjoy!

17. júní 2005

Með mömmu í tívolí síðasta sumar

Með pabba í Legolandi síðasta sumar

Á Akureyri með Þóru Björk frænku

Birkir sýnir ættarsvipinn

...og ég skil ekkert í Birki

Þú ert ekkert að fara að skora hjá mér...gæti Bjarki Fannar verið að segja!

Norsarinn í stuði

2006-01-24T12:19:00.000Z

Það fer miklum sögum af bloggleti minni. Eftirfarandi frétt er tekinn úr Mogganum:

"Forseti Íslenska lýðveldisins hefur lýst miklum áhyggjum yfir bloggleysi Snorra Arnar Arnaldssonar. Í samtali við blaðamann Morgunblaðsins hafði Ólafur Ragnar Grímsson þetta að segja, 'íslenska þjóðarsálin er í mikilli krísu þessa dagana vegna bloggleysis Snorra Arnar. Við höfum biðlað til hans og hafa samningaviðræður staðið á milli hans og forsetaembættisins um allnokkurt skeið. Ég bind miklar vonir við áframhaldandi blogg frá Snorra.'

Ég get ekki annað en tekið forsetann á orðinu og bloggað.

Ég var í Noregi um helgina, þar var kalt, miklu kaldara en á Íslandi. Það var líka mikill snjór í Noregi, miklu meira en á Íslandi. Ég set kannski inn ferðasögu þegar ég nenni, ef ég nenni þá. Það er aldrei að vita nema forsetinn fari í undirskriftasöfnun til að fá ferðasögu...

Déskotans Vitleysa

2006-01-11T15:46:00.000Z

Ég er ekki sérlega hrifinn af DV. Mér þykir þeir vera siðlausir. Mér þykir þeir ganga of langt í mynd- og nafnbirtingum (sbr. hermannaveikina og manninn sem tók líf sitt á Ísafirði). Mér þykir sorglegt að þeir reyni að verja þessa blaðamennsku sem nánast allir aðrir fordæma. Þar á meðal ég. Ég fordæmi blaðamennsku DV. Reyndar tel ég hana ekkert eiga skylt við blaðamennsku. Þeir mega sannarlega skammast sín á DV. Þetta er algjört sorpblað af versta toga.

Long time no blog

2005-12-27T23:26:00.000Z

Suddalega langt síðan ég nennti að blogga síðast og ég nenni því varla núna.

Jólin voru góð, fékk gott að borða og góðar gjafir. Bjarki Fannar er búinn að vera í feiknastuði og var sérlega ánægður með allar gjafirnar sem hann fékk.

Ég kláraði bæði mín próf fyrir jól, fékk 8 í öðru þeirra en er að bíða eftir einkunn í hinu, held að ég hafi staðið mig ágætlega í því.

Fór í ræktina í morgun í fyrsta skipti í of langan tíma. Formleysi og reykt kjöt fara ekki vel í mann, ég var gjörsamlega sprunginn eftir um 30 sek.

Raggí frænka er að fara að gifta sig á fimmtudag og Bjarki Fannar verður brúðarsveinn (held að það heiti brúðarsveinn).

Ég eyði 0 kr. í flugelda í ár, það er jafn mikið og öll síðustu 29 árin í lífi mínu.

Ég er að lesa 'It's not about the bike: The journey back to life', bók sjálfsævisaga Lance Armstrong skráð af Sally Jenkins. Ég er að verða hálfnaður með hana og verð að segja að hún er verulega áhugaverð. Eins og flestir vita, þá er Lance Armstrong einn besti hjólreiðamaður sem hefur fæti stigið á þessa jörð. Hann fékk krabbamein um miðjan síðasta áratug, tókst að sigrast á því og í framhaldinu tókst honum að vinna Tour de France 4x (að mig minnir). Að vinna Tour de France 1x er afrek, en að vinna keppnina 4x eftir að hafa sigrast á krabbameini er einstakt. Alltaf gaman að lesa bækur eftir afreksmenn.

Ég er þyngri en ég hef nokkru sinni verið áður, nú verð ég einfaldlega að taka mig á. Ég náði að létta mig verulega með Líkami fyrir lífið áætluninni um árið, nú er komið að því að endurtaka það og reyna að halda það út lengur en áætlunin nær (12 vikur).

Ég verð þrítugur kl. 00:12 þann 9. maí 2006. Helga verður þrítug þann 26. júní 2006, ég geri ráð fyrir að við höldum upp á sextugsafmæli okkar um mánaðarmótin maí-júní. Allir sem vilja velkomnir. Formlegt boð kemur seinna.

Uppfærður jólagjafalisti

2005-12-14T01:36:00.000Z

Ég mundi eftir einu til viðbótar sem ég myndi gjarnan þiggja í jólapakkann í ár. Nýja meistaradeildartreyja Liverpool er sérlega vel heppnuð að mínu mati og væri vel þegin ef einhverjum langar að gefa mér. Það er þó aðeins treyjan sem ég hefði áhuga á, ég myndi aldrei nota stuttbuxurnar...

Nokkur vídeó...

2005-12-13T01:27:00.000Z

...fyrir þá sem hafa áhuga á að kíkja á Pippen og sjá af hverju þessi leikmaður var einn af þeim allra bestu.

Vídeó 1, Pippen við tónlist Jay-Z, 2:46 mín
Vídeó 2, Pippen við tónlist Q-Tip, 3:19 mín
Vídeó 3, Pippen og Jordan myndband, 3:23 mín
Vídeó 4, kynningarmyndband um Pippen gert í tengslum við númeraupphenginguna, 3:43 mín
Vídeó 5, high-light af Pippen við tónlist Method Man/Redman, 3:00

#33

2005-12-13T01:07:00.000Z

Chicago Bulls voru um daginn að hengja upp númer Scottie Pippen, #33. Fyrir þá sem vita ekki um hvað málið snýst, þá hefur það verið hefð í NBA (og eflaust fleiri Amerískum íþróttum) að hengja upp númer þeirra leikmanna sem hafa staðið sig framúrskarandi vel.

Scottie Pippen var einn af mínum uppáhaldsleikmönnum, mér þótti hann um margt skemmtilegri leikmaður en Michael Jordan (þó það verði ekki umdeilt að Jordan er kóngurinn), þar sem leikur hans byggðist ekki bara upp á að gera flotta hluti, heldur frekar að vera mr. solid. Pippen er einn af allra bestu körfuboltamönnum allra tíma, hann var frábær varnarmaður, öflugur sóknarmaður og þvílíkur 'team player'. Til hamingju Pippen.

Að öðru en sorglegra máli. Richard Pryor, sá frábæri gamanleikari, er látinn. Ég man best eftir honum úr myndinni The Toy, ein skemmtilegasta mynd allra tíma, að mínu mati. Ég bið þá sem hafa ekki séð myndir með Pryor skelli sér út á næstu vídeóleigu og leigi einhverjar af hans bestu myndum. RIP Richard Pryor

Ég er skrítinn Íslendingur...viðbót

2005-11-30T21:33:00.000Z

Eitt sem ég gleymdi að taka fram um daginn sem setja mig í skrítnaÍslendingaflokkinn. Ég hef aldrei á æfi minni farið í ljós, og það sem meira er, ég kem aldrei á æfi minni til með að fara í ljós (nema það verði í lækningaskyni).

NFS

2005-11-30T21:26:00.000Z

Ein ný smá pæling um NFS, hvenær hættir NFS að vera NFS og verður þá FS eða GFS (G=gamla)? Hvenær hætta hlutir eiginlega að vera nýir og flokkast sem hvorki nýir né gamlir, og hvenær er svo hægt að fara að flokka hluti sem gamla? Hvaða snilling datt svo í hug að skýra sjónvarpsstöð Nýju Fréttastöðina? Hvað ef annað fjölmiðlafyrirtæki stofnar aðra fréttastöð, er þá eðlilegt að eldri fréttastöðin heiti Nýja Fréttastöðin?

Það er þó eitt jákvætt við þetta, þeir skírðu þó ekki fréttastöðina NFS.is!

Óskalisti fyrir jól 2006

2005-11-29T18:05:00.000Z

Jæja, þá fer að líða að jólum, eða eins og segir í laginu "Bráðum koma blessuð jólin". Þá er ekki seinna að vænna en að skella fram jólagjafaóskalista, en það er best að setja smá fyrirvara fyrst. Einhverjar vörur eru eflaust allt of dýrar, þannig að fólk má að sjálfsögðu rotta sig saman og splæsa í eina gjöf :) Ég verð samt þakklátur fyrir allt sem ég fæ í jólagjöf.

1. Canon EOS 20D eða 350D. Ég hef mjög gaman af því að taka myndir, eins og einhverjir vita, og það er fátt skemmtilegra en að taka myndir á góða myndavél. Þessar tvær eru mjög góðar, en kosta vitanlega sitt. Ég leyfi mér að stórefast um að þetta rati í jólapakkann í ár, en það má þó láta sig dreyma! Fæst t.d. í Hans Petersen (eða í fríhöfninni eða USA fyrir ferðalanga)

2. Gjafabréf í Kringluna. Fyrir þá sem vita ekkert hvað á að gefa mér. Mig vantar föt og gjafabréf í Kringluna kæmu sér verulega vel í þeim efnum. Mér þykir miklu betra að versla í Kringlunni en Smáralind, þess vegna set ég gjafabréf í Kringluna, en ekki gjafabréf í Smáralind á óskalistann. Fæst á upplýsingaborðinu fyrir framan Hagkaup á 1. hæð í Kringlunni.

3. Buzz. Spurningaleikur í Playstation 2 sem hefur fengið frábæra dóma. Jólaspilið í ár! Fæst t.d. í BT og Skífunni.

4. Bílahleðslutæki fyrir iPod. Algjör nauðsyn á ferðalaginu. Ég veit ekki hvort þetta fæst í Apple búðinni hérna heima, en það er alltaf hægt að panta í gegnum netið!

5. Ég mundi eftir einu til viðbótar sem ég myndi gjarnan þiggja í jólapakkann í ár. Nýja meistaradeildartreyja Liverpool er sérlega vel heppnuð að mínu mati og væri vel þegin ef einhverjum langar að gefa mér. Það er þó aðeins treyjan sem ég hefði áhuga á, ég myndi aldrei nota stuttbuxurnar...

Ég bæti svo við eftir þörfum. Gleðileg jól!

Aumingi ársins!

2005-11-17T13:23:00.000Z

...er ég, í það minnsta þessa stundina. Ég er meiddur, eins og hefur komið fram áður. Ég fór til læknis í gær til að láta kíkja á meiðslin, og þá var grunur minn staðfestur, ég er með bólgur á hásin vinstra megin. Það kom hins vegar meira í ljós, ég er með bólgur á hásin hægra megin líka, eitthvað sem ég var ekki búinn að finna fyrir. Sem betur fer eru einkennin á byrjunarstigi, þannig að auðveldara er að lækna þetta, en það tekur engu að síður 2-3 mánuði að losna við bólgurnar, og svo verður maður að fara rólega af stað til að þær komi ekki strax aftur. Gaman gaman...

Í öðrum fréttum, ég keypti mér skemmda peru í Hagkaup í dag en peran átti að vera hluti af hádegismatnum mínum, í staðinn lét ég mér nægja þykkmjólk og banana.

Ég er skrítinn Íslendingur - UPPFÆRT

2005-11-14T12:22:00.000Z

Ég borða ekki fisk, nema lax.
Ég drekk ekki áfengi.
Mér finnst ekkert sérlega spennandi við risastóra jeppa.
Ég hef aldrei verið í sveit.
Ég hef aldrei unnið á sjó.
Mér finnst best að búa á Íslandi.
Ég vil ekki búa í miðbænum og ég vil ekki búa nálægt miðbænum.
Mér þykir Séð og heyrt og Hér og nú ómerkilegir bleðlar.
Íslenskt celebrity, hvað er það?
Mér finnst skemmtilegra að vera heima á föstudags- eða laugardagskvöldum en að fara í bæinn að djamma
Ég hef aldrei aflitað á mér hárið
Mér finnst ekki gaman að horfa á handbolta
Ég hef aldrei verið með yfirdrátt
Ég keypti mér bíl í fyrsta skipti þegar ég var 27 ára gamall

En það sem ég á líklegast sameiginlegt með mörgum Íslendingum...
Ég hef eytt flestum árum æfi minnar í skóla
Ég drekk mikið gos
Ég fer nánast aldrei í kirkju
Ég þarf að skafa bílinn minn á morgnana
Ég tek mér allt of mikið fyrir hendur
Ég hef prófað strípur, það gerðist bara 1x og gerist aldrei aftur

Eflaust má tína fleira til, en ég læt þetta duga að sinni

Ótrúlegur drengur

2005-11-10T18:22:00.000Z

Í morgun vaknaði Bjarki Fannar á réttum tíma, klæddi sig og fór svo inn í herbergi til sín aftur. Stuttu síðar fór ég og leit á hvað hann væri að bralla, þá sagðist hann vera að taka til!!! Spáið í því, sjö ára pjakkur að taka til kl. 7:30 að morgni að eigin frumkvæði!

Blogg

2005-11-08T23:07:00.000Z

Langt síðan maður hefur bloggað.

Ég ætlaði að blogga um daginn en þá gekk heldur erfiðlega að logga mig inn á bloggerinn, svo ég gafst bara upp.

Er að verða hress aftur, fékk leiðindarkvef og hálsbólgu í síðustu viku og er svona nánast búinn að ná mér. Ég er hins vegar enn slæmur í hásin, en er þó hægt batnandi, frekar pirrandi.

Var að klára síðasta verkefnið á þessari önn, skila því á fimmtudag, það verður nett hressandi. Svo tek ég tvö próf í desember, það fyrra 8. desember og það seinna 20. desember.

Annars bara góðar stundir.

Veikur aumingi

2005-10-31T10:33:00.000Z

Jamm, kallinn er veikur í dag. Síður en svo jákvætt, sérstaklega þar sem ég er meiddur líka. Það þýðir samt að leiðin liggur bara upp á við héðan af.

Latibær, dómgæsla og skrokkurinn

2005-10-24T10:16:00.000Z

Á laugardag fór ég út á Reykjavíkurflugvöll ásamt Bjarka Fannari og besta vini hans, Sigga, að kíkja á Latabæjarskemmtunina sem þar var haldin. Ég bjóst við múg og margmenni, en ekki heilum 15.000 höfuðborgarbúum, sem varð raunin. Þvílík stappa. Strákarnir skemmtu sér samt vel, sem er fyrir mestu.

Ég dæmdi tvo leiki um helgina, annars vegar leik Fjölnis og Snæfells í unglingaflokki þar sem Snæfellingar komu flestum á óvart og sigruðu, og hins vegar leik KR-b og Deiglunnar í 2. deild karla. Seinni leikurinn var mikill hitaleikur, þar sem annað liðið var ekki alveg sátt, en það fylgir þessu. Ég dæmdi báða leikina eftir minni sannfæringu og að sjálfsögðu verður því ekkert breytt eftir á.

Það merkilegasta við helgina er samt hversu skrokkurinn er góður eftir þessa tvo leiki. Ég var reyndar nokkuð snjall á laugardag, fór og keypti mér hitahlíf fyrir annað hnéð til að reyna að losna við þrálátan hnéverk sem ég hef verið með í hægra hné, og viti menn, ég elska hlífina. Ég fann ekkert fyrir hnéverknum og var meira að segja góður eftir á. Svo prófaði ég að nota hitakrem á ökklann, en vinstri ökklinn hefur líka verið að hrjá mig, og viti menn, það virkaði líka. Var góður í bæði hné og ökkla meðan á leikjunum stóð og eftir á líka, sem er nú ekki minna mikilvægt, þannig að í dag er fyrsti dagurinn í ansi langan tíma þar sem ég er hvorki með verk í hné né ökkla, bara brilliant.

Kvennafrídagurinn

2005-10-21T15:11:00.000Z

Mig langar aðeins að kommenta á kvennafrídaginn sem verður nú á mánudag. Ég hef ekkert á móti jafnrétti kynjanna, enda er ég þeirrar skoðunar að fólk á að fá greitt skv. hæfni en ekki skv. kyni, þ.e. jafn hæft fólk á að fá jafn há laun vinni það sama starf, óháð kyni.

Ég þarf hins vegar aðeins að gagnrýna kvennafrídaginn og það er útreikningurinn á launamuni kynjanna. Konur ætla að leggja niður störf kl. 14:08 á mánudag vegna þess að þær eru með 64,15% af launum karlmanna. Ég hef sitthvað við þessa tölu að athuga, enda engar kannanir sýnt að það sé svona mikill launamunur milli kynja. Eftir því er ég hef komist næst, þá birtist þessi 64,15% munur í skattaskýrslum karla og kvenna, þ.e. munur á heildarlaunum karla og kvenna. Þessi útreikningur er svo fjarri því að vera í lagi, því með sama útreikningi er ekkert mál að finna mun á milli hinna og þessarra, jafnvel milli karlmanna innan sömu stéttar, því það er ekki tekið tillit til vinnutíma. Skv. VR könnuninni er um 14% launamunur milli kynjanna að teknu tilliti til lengdar vinnuviku og fleiri tengdra áhrifaþátta. Ég held að þetta sé nærri lagi og er í takt við það sem hefur komið fram í öðrum könnunum sem hafa verið í fréttum. Ég er því algjörlega á móti því að konur leggi niður störf kl. 14:08 m.v. þessar forsendur, því ef miðað er við 9-17 vinnudag (480 mín * 0,14 = 67,2) þá ættu konur að leggja niður vinnu kl. 15:53. Miðað við þessar 'fabríkeruðu' niðurstöður á launamun kynjanna næst meiri munur og þannig hægt að fá dramatískari niðurstöður. Ég styð ekki jafnréttisbaráttu á fölskum forsendum.

Áfram jafnrétti, á réttum forsendum!

Spennó

2005-10-21T13:49:00.000Z

Það er að koma út ný bók um Michael Jordan. Ég held að ég verði að verða mér út um hana...

Ég fékk mér nokkuð góða samloku í hádeginu, kalkúnasamloka í tómatbrauði frá Sóma. Hún verður eflaust fyrir valinu einhvern tíma aftur á næstunni.

Svo er það bara helgin...

Fimmtudagsbull

2005-10-20T10:03:00.000Z

Ég er búinn að vera svakalega þreyttur síðustu vikur, alveg gjörsamlega óþolandi. Ég þarf eitthvað að fara að gera í þessu, því það gengur ekki að vera drulluþreyttur þegar maður vaknar, þreyttur allan daginn. Ég ætla að fara að sofa fyrir klukkan ellefu næstu kvöld og sjá hvort það dugi. Maður nær heldur ekki að vera jafn einbeittur og maður þarf þegar þreytan er svona að sliga mann og er að sjálfsögðu ekki jafn hress og maður ætti að vera.

Núna sit ég í fyrirlestrasal í Þjóðminjasafni Íslands. Þið getið alveg verið róleg, ég er ekki að grafa upp fornminjar með kúst og skóflu, ég er á fyrirlestri í stjórnun og skipulagsheildum. Nokkuð áhugavert, maður er að skoða mismunandi skipulag fyrirtækja, mismunandi stjórnunarstíla og hvernig maður sjálfur er sem stjórnandi.

Helgin verður nokkuð þétt skipuð hjá mér. Að venju er ég að vinna til hádegis á morgun, svo er stefnan tekin á smá lærdóm fram eftir degi og að lokum æfing og föstudagskvöldsafslöppun. Á laugardag er það lærdómur og dómgæsla og á sunnudag er það æfingaleikur, vinamót og dómgæsla. Þá er helgin svo gott sem búin! Góða helgi.

Hugtakaruglingur

2005-10-18T14:33:00.000Z

Það fer stundum margt í taugarnar á mér. Hugtakaruglingur fer í taugarnar á mér, sérstaklega þegar fólk notar hugtökin tvöfalt meira og helmingi meira með sömu merkingu. Þessir hlutir merkja ekki það sama. Ef Jón er með 1000 krónur, Siggi með 1500 krónur og Gunni með 2000 krónur, þá er Siggi með helmingi meira en Jón og Gunni með tvöfalt meira en Jón. Jón er hins vegar með helmingi minna en Gunni. Einfalt, ekki satt!

Bloggleti, veður, skóli og almenn leti

2005-10-16T10:07:00.000Z

Ég hef verið hrjáður af bloggleti á háu stigi síðustu dagana. Ég lofa ekki bót og betrun þar sem ég veit ekki hvort ég er kominn yfir letina, það verður að koma í ljós.

Það er búið að vera skítaveður undanfarið, fyrst var kalt, svo í gær og í dag er orðið hlýtt en þá rignir og rignir og rignir. Ekki gaman.

Nú er önnin hálfnuð í skólanum hjá mér, skilaði verkefni í síðustu viku og á að skila öðru verkefni í næstu viku, þarf að fara að drífa það af. Svo er meira en nóg að lesa. Kosturinn við þetta er að námið er skemmtilegt!

Annars er ég búinn að vera frekar latur síðustu daga, svona almennt séð. Verð að fara að rífa mig aðeins upp svo þetta endi ekki í volæði og aumingjaskap. Áfram Snorri!!!!!

Flottur vefur

2005-10-11T18:24:00.000Z

KKÍ opnaði í dag nýjan vef, en eldri vefur sambandssins hafði verið í notkun í fimm ár (en það telst nú vera nokkuð langur líftími vefja). Gunnar Freyr á veg og vanda að þessum glæsilega vef. Ég mæli með því að fólk kíki minnsta kosti einu sinni á vefinn, bara svona til að sjá flottheitin.

Kominn heim

2005-10-10T19:59:00.000Z

Þá er ég kominn heim frá Álandseyjum, en þar var ég á Barn och ungdomskonferens. Það var stuð og gaman, en ég er engu að síður feginn að vera kominn heim. Ferðasagan er í smíðum, en það verður svo að koma í ljós hvort ég hafi það í mér að klára hana innan einhverra eðlilegra tímamarka.

Útlönd

2005-10-04T21:27:00.000Z

Eldsnemma á fimmtudagsmorgunn legg ég af stað til Finnlands á ráðstefnu um mótahald yngri flokka. Það verður flogið til Stokkhólms með morgunflugi, tekin rúta eitthvað norður fyrir borgina og þaðan verður farið með ferju yfir til Álands, sem liggur víst rétt út fyrir strönd Svíþjóðar, en tilheyrir Finnum. Þar verð ég allt fram á sunnudag, en áætluð lending er kl. 23:25 á sunnudagskvöld. Dagskráin er spennandi, en þessi ráðstefnan er haldin þriðja hvert ár og fjallar alltaf um íþróttir barna og unglinga, en í ár verður aðalfókusinn á mótamál. Það er sérlega heppilegt, því ég er í milliþinganefnd KKÍ um mótahald yngri flokka, þannig að maður vonar að þarna úti sjái maður nýjar leiðir að gömlum vandamálum hér heima.

Að öðru leyti er mest lítið að frétta. Lífið er vinna, skóli, körfubolti og fjölskylda, en það er stundum dálítið erfitt að púsla þessu öllu saman svo vel sé.

Erfið helgi að baki

2005-10-03T11:56:00.000Z

Jæja, þá er erfið helgi að baki.

Hún hófst með bóklegu prófi í körfuknattleiksreglunum, ég veit ekki betur en að það hafi gengið ágætlega, það kemur þó í ljós. Því næst var tekið þrekpróf, það gekk ekki alveg sem skyldi (var síður en svo sáttur við sjálfan mig), en var fín vakning fyrir mig. Það er ljós að ég er ekki í formi til að komast upp í A-flokk, ekki að ég ætti von á því þó ég hefði náð prófinu þannig. Nú hefur maður einhvern útgangspunkt til að miða við og svo er bara að standa sig betur næst (hvenær sem það verður).

Eftir þrekprófið var brunað heim, tekin ein sturta og svo klárað að gera allt klárt fyrir afmælið hans Bjarka Fannars. Upp úr þrjú fóru krakkarnir svo að skila sér í afmælið. Bjarki Fannar fékk nokkrar gjafir og marga fimmhundruðkalla í afmælisgjöf og var þvílíkt sáttur. Svo var boðið upp á heimalagaðar pitsur, muffins og lestarköku. Afmælið gekk vel, svona fyrir utan allan hávaðann, en við hverju öðru á maður að búast af 16 sjö ára pjökkum...

Gærdagurinn hófst á æfingu, svo dæmdi ég á fjölliðamóti og fylgdist aðeins með Liverpool-Chelsea. Mínir menn skitu allhressilega upp á bak í þeim leik og þurfa að fara að taka sig á ef eitthvað á að nást út úr leiktíðinni.

Fyrir utan allt þetta þá var bara setið yfir skruddunum að læra.

Stuð, fjör og gaman...og eitt stykki fitness test

2005-09-30T19:13:00.000Z

Jæja, haldið þið bara ekki að kallinn er að fara í fitness test í fyrramálið. Það kemur til af því að ég er að fara að dæma í vetur og til þess að ég geti fengið einhverja djúsí leiki verð ég að ná testinu. Ég er ekkert allt of bjartsýnn á það svona fyrirfram, en nú verður látið reyna á þrjóskuna. Ég skal...

Svo er bekkjarafmæli hjá Bjarka Fannari á morgun, 15 hressir krakkar sem eru með honum í bekk koma, auk einhverra frændsystkina á svipuðum aldri (eldri frændsystkini eru að sjálfsögðu velkomin). Í boði verða kökur, heimabakaðar pitsur og muffins.

Á sunnudag er það svo lærdómur, æfing, dæma, leikur, lærdómur, í þessari röð.

Ég verð semsagt dauður á mánudag...

Skítaveður

2005-09-29T20:34:00.000Z

Um daginn kvartaði ég yfir kuldakasti í september, nú stefnir í brjálað rok og alsherjarleiðindi, ekki byrjar veturinn vel.

Bjarki Fannar átti afmæli í gær, eins og glöggir lesendur hafa tekið eftir. Í því tilefni var honum haldin smá veisla þar sem ömmum og öfum var boðið. Hann fékk ágætis summu frá ömmu og afa í Hábæ og rafmagnslegolest frá ömmu og afa í Heiðarbæ, og Birki frænda. Hann var ekkert smá ánægður með gjafirnar, og er nú þegar búinn að eyða talsverðum tíma í að púsla saman lestinni, það kláraðist áðan og nú er bara eftir að setja saman lestarvagnana. Það verður stuð.

Skólinn er á milljón, fyrstu verkefnaskilin er að renna í hlað. Ég á að skila verkefni næsta fimmtudag, er að klára að massa það, svo verður maður bara að halda áfram að taka lesturinn með trukki...

Bjarki Fannar orðinn 7 ára

2005-09-28T10:02:00.000Z

Fyrir sjö árum síðan fæddist lítill peyji, sem seinna hlaut nafnið Bjarki Fannar og er Snorrason. Drengurinn hefur vaxið hratt úr grasi og er í dag orðinn sjö ára gamall, og stór eftir aldri. Hann er stolt foreldra sinna og að mínu mati besti drengur í heimi.

Innilega til hamingju með afmælið Bjarki Fannar minn.

Myndin er tekin í morgun þegar strákurinn tók upp aðra afmælisgjöfina sína.

Veikindi

2005-09-27T20:56:00.000Z

Ég hef blessunarlega sloppið við veikindi á haustmánuðum, þó margir í kringum mig, bæði vinnu og fjölskyldu, hafi verið að veikjast. Ég var hins vegar ekki jafn heppinn í lok júlí, en þá kom smá góðviðriskafli, þar sem hitinn rauk vel upp fyrir 20 gráðurnar og sólin skein hvað glaðast. Þessi góðviðriskafli var líklegast sá besti í sumar, en ég gat engan veginn notið hans því ég þurfti að dúsa í rúminu með hita, háls- og kinnholubólgu, sérlega óspennandi. Má ég þá frekar biðja um að vera veikur þegar veðrið er eins og það hefur verið síðustu vikurnar...

Myndasafn/gallery

2005-09-26T20:13:00.000Z

Veit einhver um gott og ókeypis myndasafn (gallery) sem maður getur nýtt sér? Mig langar svo að geta sett eina og eina mynd á netið fyrir þá sem vilja skoða en finn ekkert sem mér finnst ég geta sætt mig við. Endilega látið mig vita ef þið vitið af einhverju. Af 'gömlum' vana læt ég eina mynd fylgja færslunni.

Skafa

2005-09-25T20:48:00.000Z

Alla síðustu viku þurfti ég að skafa bílinn á morgnana, það þykir mér síður en svo skemmtilegt. Þið getið rétt ímyndað ykkur hversu undrandi ég var (myndin segir meira en þúsund orð) þegar ég kom út á mánudagsmorgun og sá mér til mikillar undrunar (og jafnvel hryllings) að ég þyrfti að skafa bílinn um miðjan septembermánuð, ég meina kommon, við búum á Íslandi, ekki norðurpólnum...

Dæma mæma

2005-09-23T15:54:00.000Z

Í kvöld dæmi ég minn fyrsta leik á þessu tímabili, viðureign Stjörnunnar og Njarðvíkur í Reykjanesmóti meistaraflokks karla. Það kom reyndar óvænt upp á, þar sem um helgina er dómaraþing og flest allir dómarar landsins þar. Ég var því boðaður til þar sem ég kemst ekki á dómaraþingið vegna lærdóms. Þetta verður stuð.

Skemmtilega gagnslaus staðreynd sem Birki tókst að grafa upp í netgrúski sínu. Í raun var ég mest með 1680 skákstig á mínum sokkabandsárum, en með minnkandi tíma sem ég eyddi í skákina þá fór þeim ört fækkandi, ég efast að ég gæti haldið þessum stigum ef ég færi að tefla í dag.

Klukkaður

2005-09-21T21:35:00.000Z

Gunnar Freyr klukkaði mig í gær og ég get ekki skorast undan þeirri ábyrgð sem klukkinu fylgir. Mér skilst að klukkinu fylgi að setja saman lista yfir fimm gagnslaus atriði um mann sjálfan, so here goes...

1) Ég var ljóska þegar ég var barn, en það eltist af mér
2) Ég kann sænsku
3) Ég er lofthræddur
4) Ég ætlaði einu sinni að verða kennari, þar áður ætlaði ég að verða arkítekt, í dag er ég viðskiptafræðingur, connection anyone???
5) Þegar ég geng með úr, þá er ég með það á hægri hönd þrátt fyrir að vera rétthentur!

Ég ætla svo að klukka fimm aðra, Bennu, Birki, Jóa, Röggu og Sigurgeir. Það er svo undir þeim komið hvort þau taki klukkinu!

Hollusta og mataræði

2005-09-20T10:00:00.000Z

Fyrir þá sem eru sífellt að spá í hollustu og mataræði er gott að hafa eftirfarandi í huga:

Japanir borða mjög lítið af fitu og fá færri hjartaáföll en Bretar og Bandaríkjamenn.
Frakkar borða mikið af fitu og fá líka færri hjartaáföll en Bretar og Bandaríkjamenn.
Japanir drekka mjög lítið af rauðvíni og fá færri hjartaáföll en Bretar og Bandaríkjamenn.
Frakkar drekka óhóflega af rauðvíni og fá líka færri hjartaáföll en Bretar og Bandaríkjamenn.

Niðurstaðan er rökrétt og einföld, borðaðu og drekktu það sem þú vilt, enska er það sem virðist drepa fólk.

Veiðimaður

2005-09-19T10:42:00.000Z

Bjarki Fannar og Helga voru að spila veiðimann gær. Bjarki Fannar er alltaf að æfa sig í ensku, finnst gaman að telja á ensku og ákvað því að það væri sniðugt að spyrja á ensku í veiðimann.

Bjarki Fannar "Mamma, áttu seven?"
...
Bjarki Fannar "Mamma, áttu two?"
...
Bjarki Fannar "Mamma, áttu ten?"
...
Bjarki Fannar "Mamma, áttu cock?"

Þá missti Helga andlitið en spurði Bjarka Fannar engu að síður hvað hann væri að meina. Strákurinn vissi nátturulega ekkert hvað hann var að segja en var að reyna að bjarga sér á ensku og ætlaði að spyrja hvort mamma sín ætti kóng...svona er sjálfsbjargarviðleitnin!

Helgi

2005-09-17T16:31:00.000Z

Það er ekki mikill munur á helgardögum og virkum dögum hjá manni núna, er í vinnunni að klára smá verk, fer svo heim að læra. Svo verður maður víst að læra allan morgundaginn.

Lag dagsins er sunnudagsslagarinn Easy með rokkbandinu Faith No More. Eðal sunnudagsslagari sem hentar vel í helgarrólegheitin.

Official

2005-09-16T14:01:00.000Z

Jæja, þá er það official, ég verð official í vetur. Gaman að svona orðaleikjum :)
Ég er semsagt að fara að dæma körfubolta í vetur, verð official dómari. Ég hef tekið dómarapróf tvisvar sinnum, en aldrei notað það mér til framdráttar í dómarastéttinni. Ég ætla hins vegar að breyta því í vetur og sjá hvert það leiðir.

Lag dagsins er No Surprises með Radiohead, bandið sem ég fílaði í ræmur en hafa fjarlægst þá stefnu sem þeir hófu á The Bends og þróuðu áfram á OK Computer, báðar plöturnar tær snilld. No surprises er af OK Computer, mæli með henni fyrir alla áhugamenn um breska tónlist.

Smá afsökun, en stundum bissí

2005-09-15T21:47:00.000Z

Já, það kemur fyrir að ég verð dálítið bissí, ég verð því að biðja þá fáu dyggu lesendur mína afsökunar fyrir að blogga svona seint að kvöldi.

Dagurinn í dag var viðburðarríkur. Ég var í skólanum í morgun að fræðast um skipulagsheildir og stjórnun, sannarlega fræðandi og skemmtileg uppfræðsla. Mikið rætt um kenningar Taylors, en einnig var rætt um Hawthorn rannsóknirnar og Max Weber, ásamt öðrum fræðimönnum og kenningum, sannarlega áhugavert. Því næst tók við smá bögg í TM og KB Banka, en vegna snilligáfu minnar kláraði ég það á mettíma með metárangri. Í hádeginu var ég á fundi hjá ÍSÍ og fékk þar snilldar hádegisverð í boði ÍSÍ, Bayonneskinku og meðlæti, svolgraði vatn með því. Eftir fundinn var komið að tíma í aðferðarfræði, áhugavert. Svo endaði dagurinn heima að læra. Stuð.

Farið vel með ykkur.

Dagurinn sem bróðir minn varð brjálaður út mig fyrir misskilning

2005-09-14T13:38:00.000Z

Í dag er sögustund með Snorra. Ég ætla að segja ykkur frá því þegar bróðir minn, hann Birkir, varð brjálaður út mig fyrir algjöran misskilning. Þannig var mál með vexti ég var í æsku mikill Red Hot Chilli Peppers aðdáandi, það hefur svo sem ekki mikið breyst í gegnum árin. Þetta gerðist árið 1995, daginn sem plata One Hot Minute kom út. Ég hafði gert mér ferð í bæinn eftir skóla til að nálgast gripinn, enda mjög spenntur að heyra iðilfagra tóna hljómsveitarinnar leika um hljómflutningstæki Reykáss 1. Þegar heim var komið skellti ég gripnum í græjurnar í stofunni og lagðist upp í sófa til að njóta. Þeir sem hafa hlustað á diskinn vita að í fyrsta laginu, Warped, er mjög langt intro, svona ca. 40 sek. Þetta vissi ég ekki á þessum tíma. Þarna sem ég lá í sófanum og heyrði ekkert fór ég að velta því fyrir mér hvað væri í gangi, þannig að ég stóð upp og rölti yfir að græjunum til að kíkja á málið. Jújú, geislaspilarinn var að spila og græjurnar voru ekki á mute en samt heyrðist nánast ekkert. Ég ákvað því að hækka duglega í græjunum. Svo kom þessi svaka hvellur, introið var búið og lagið byrjað og það byrjar af krafti. Ég hrökk við og lækkaði snarlega í græjunum, þ.e. þegar ég var búinn að ná mér eftir hvellinn. Það sem ég vissi hins vegar ekki var að Birkir hafði komið heim úr skólanum á undan mér og hafði lagt sig eftir erfiðan skóladag. Hann hrökk auðvitað upp við þessi dómsdagslæti og var síður en svo hress. Ég reyndi að útskýra málið, en ég held að hann hafi ekki trúað mér (kannski vegna þess að ég hlustaði oft á tónlist hátt stillta) og ég veit í raun ekki hvort hann hafi enn fyrirgefið mér. Sorry Birkir...

Lag dagsins er snilldar hljóðverkið Under The Bridge með títtnefndri hljómsveit, Red Hot Chilli Peppers. Lagið er tekið af bestu plötu þeirra, Blood Sugar Sex Magic, sem kom út 1991 eða 1992. Platan er sú langbesta sem þeir hafa gefið út, og þá er mikið sagt. Ég hvet þá sem heilluðust af Californication og By the way að leggja leið sína í næstu plötubúð og skella sér á eintak af Blood Sugar Sex Magic, algjör skyldueign í öll plötusöfn.

Bónus - býður betur meðan þú bíður og bíður og ...

2005-09-13T16:45:00.000Z

Ég fer ekki leynt með það, ég kaupi mínar matvörur í Bónus. Það er hins vegar eitt sem hefur farið í taugar mínar að undanförnu, það er hægagangurinn á kassastarfsfólki Bónuss. Ég fór í Bónus fyrir nokkrum dögum og manneskjan sem var á kassanum var alls ekkert að flýta sér, hún sat þarna í rólegheitum, rúllaði vörunum í gegn líklegast eins hægt og hugsast getur og á meðan safnaðist í myndarlegar raðir við hennar kassa og aðra. Frekar pirrandi, eina sem getur huggað mann er hugsunin um þyngri pyngju vegna sparnaðarins...

Aukablogg

2005-09-12T12:41:00.000Z

Margir vita ekki hvar ég er að vinna og kannski best að segja frá því hérna. Ég er hættur hjá Pennanum, kominn í mastersnám og er að vinna sem rekstrarstjóri í borgarhluta 4 hjá ÍTR. Mín starfsstöð er í Grafarvogi í gamla Gufunesbænum í Gufunesi. Þá vitið þið það.

Á myndinni má sjá Gufunesbæinn vinstra megin, en þar er frístundastarfsemi í Grafarvogi stjórnað. Hægra megin er hlaðan og turninn, en bæði innan og utan á turninum eru klifurleiðir upp í 13 metra hæð.

Rokk er málið

2005-09-12T10:42:00.000Z

Ég hef alla tíð hlustað mikið á tónlist, samt man ég eiginlega ekkert hvað ég hlustaði á áður en Bjössi frændi minn kynnti mig fyrir rokkinu. Það gerðist í kringum 10-12 ára aldurinn, en Bjössi er einmitt jafn gamall mér. Við vorum þá miklir vinir, hittumst mikið og lékum okkur saman. Hann kynnti m.a. fyrir mér Metallica, Megadeth, Slayer, Pantera og fleiri bönd. Aðeins Metallica hefur fylgt mér frá þessum árum en önnur bönd hafa bæst í sarpinn á leiðinni, eins og t.d. Pearl Jam (í miklu uppáhaldi), U2 (popp-rokk), Radiohead, Alice In Chains, Audioslave, Smashing Pumpkins, Live, Red Hot Chilli Peppers, Weezer og Verve. Upp á síðkastið (síðustu 5 ár eða svo) hafa hljómsveitirnar Green Day, Korn, Turin Brakes, Foo Fighters, Incubus og Coldplay bæst við listann, sem er þá orðinn nokkuð langur. Inn á milli detta eitt og eitt lag með hinum og þessum böndum. Hins vegar er ákveðin tónlistarstefna sem fer í mínar fínustu og mér þykir mest lítið til hennar koma. Þarna eru hljómsveitir eins og Linkin Park og önnur hljómsveit sem ég man ekki akkúrat núna hvað heitir en mér þykir leiðinleg.

Sunnudagsverk

2005-09-11T16:34:00.000Z

Sunnudagsverkin eru alltaf jafn skemmtileg. Ég er ekki að tala um tiltekt eða sunnudagseldamennsku, heldur eru sunnudagsverkin mín í vetur að þjálfa og læra svo það sem eftir er dags. Fönn fönn fönn eins og einhver orðaði það hér um árið. Ákvað að láta mynd af mér læra fylgja með, það er svo gaman að geta sett inn myndir án of mikils vesens.

Við vorum með Víði, Berglindi og hundinn þeirra í mat í gærkvöldi. Ég spurði Víði frétta og hann sagði mér að það væri ekkert spes að frétta. Annað kom svo á daginn, prófið bara að spyrja Víði frétta.

Tannmissir

2005-09-10T11:36:00.000Z

Bjarki Fannar er akkúrat á þeim aldri núna að hann er að missa barnatennurnar. Þetta byrjaði reyndar í fyrra, en þá missti hann eina tönn, svo missti hann aðra í vor og þriðju tönnina í þessari viku. Núna virðist þetta hins vegar verið komið á fullt skrið. Eins og sést á myndinni vantar þrjár tennur, ein ný tönn er farin að gægjast upp. Hins vegar eru framtennurnar tvær í efri góm báðar lausar og detta væntanlega úr fyrir afmælið hans, sem þýðir að hann verður eins og tannlaus álfur á afmælinu sínu!

Prufa

2005-09-09T20:52:00.000Z

...að setja inn myndir

Sko

2005-09-09T09:58:00.000Z

Mér þykir það með ólíkindum að enginn þeirra örfáu lesenda bloggsíðunnar minnar skuli ekki vita svarið við málfræðispurningunni frá síðasta miðvikudegi. Svarið er einfalt, verð er eintöluorð og því getur enginn boðið bestu verðin í bænum, aðeins besta verðið í bænum.

Ég hef verið að hlusta mikið á Turin Brakes undanfarið, sér í lagi þegar allt er á milljón og maður þarf aðeins að róa hlutina niður. Snilldarband sem spilar snilldartónlist.

Að lokum ein góð úr tjónaskýrslu: „Sá fótgangandi stóð og vissi ekkert í hvora áttina hann átti að fara svo ég keyrði yfir hann."

Jólabókin í ár!

2005-09-08T15:13:00.000Z

Ég var í tíma í gær í fagi sem heitir Atvinnuvegir. Mjög sniðugt. Í tímanum sat ég nálægt konu sem var með laptop og hún var að glósa eins og flestir aðrir. Munurinn á henni og líklegast öllum í tímanum, þá skrifaði hún allt niður og þá meina ég allt. Ef kennarinn sagði ehemm, þá skrifaði hún ehemm. Þegar það var gert hlé á kennslunni, þá hélt hún bara áfram að skrifa, ekki veit ég hvað hún var að skrifa, kannski er þetta jólabókin í ár!

Orð

2005-09-07T17:05:00.000Z

Það eru nokkur orð sem fara í mínar fínustu, eða í raun er það notkun þessarra orða sem fer í mínar fínustu. Þetta eru dönskusletturnar ske og sé, mér þætti það miklu betra ef notuð yrðu orðin að gerast í staðinn fyrir að ske og er í staðinn fyrir sé. Til dæmis: "Ef þetta sé ekki gert þá mun þetta ske". Þetta er þvílík ambaga í mínum eyrum að það hálfa væri miklu meira en nóg, þessi setning hljómar betur svona: "Ef þetta er ekki gert þá mun þetta gerast". Ekki góð setning í sjálfu sér, en er sett fram til þess að skýra mál mitt. Svo má líka minnast á orðið verð, en það orð er oft skrumskælt í auglýsingum. Það eru verðlaun í boði fyrir þann sem getur fundið villuna í þessari setningu:

"Vöruúrval á öllum hæðum og bestu verðin í bænum - Kjallarabúðin"

Stundum nennir maður bara...

2005-09-05T17:53:00.000Z

...ekki að blogga, en ég geri það nú samt. Fór á landsleik í körfubolta á laugardag. Íslendingar, sem nota bene eru með sterkt landslið í körfubolta, léku eins og byrjendur mest allan leikinn og þurftu því að lúta í parket fyrir Dönum. Synd og skömm.

Bjarki Fannar fékk besta vin sinn í heimsókn í gær. Foreldrar vinar hans voru að fara út úr bænum um tíuleytið í gærmorgun og því hafði verið ákveðið að vinurinn kæmi kl. 10. Bjarki Fannar var óheyrilega spenntur, enda var búið að plana daginn. Spennan var svo mikil að hann vaknaði kl. 7, skreið upp í til mín og Helgu og spurði: 'er klukkan orðin 10?'. Yfirleitt er mjög erfitt að vekja Bjarka Fannar á morgnana, en í þessu tilfelli var þetta ekki vandamál. Dagurinn var svo frábær fyrir þá félaga, léku sér mikið, fóru í afmæli til þriðja vinarins og bekkjarbróður þeirra og voru úti mest allan daginn. Þvílík sæla :)

Minni umferð

2005-09-02T15:20:00.000Z

Það var minni umferð í morgun en í gær. Reyndar fór ég ekki vestur í bæ, heldur uppeftir í Grafarvog í vinnuna, þannig að það er ekki marktækt að bera þetta saman. Spáið samt í því, í dag er stærsti vinnustaður landsins (HÍ, nám er vinna!) og næst stærsti vinnustaður landsins (Landspítalinn) á einu litlu frímerki vestarlega í Reykjavík. Á næstu árum er stefnt að því að bæta þarna við næst stærsta háskóla landsins steinsnar frá HÍ. Eins og umferðin er núna, þá held ég að það komist enginn í skólann þegar HÍ, HR og Landspítalinn verða á sama stað í höfuðborginni. Eins gott að hespa þetta nám af...

Fáránleg umferð

2005-09-01T22:07:00.000Z

Í dag var fyrsti dagurinn minn í HÍ. Það þýddi að ég, ásamt um helmingi íslensku þjóðarinnar þurfti að keyra vestur Miklubraut og Hringbraut að HÍ eldsnemma í morgun (um kl. 8). Þetta hef ég aldrei gert áður, þ.e. keyrt vestur í HÍ á þessum tíma. Það tók mig um 15 mínútur að keyra úr Árbænum vestur að Grensásvegi, þaðan tók það mig aðrar 15 mínútur að HÍ, samtals um 30 mínútna ferð. Ég hef sagt það áður og ég segi það enn, vegakerfi höfuðborgarsvæðisins hentar ekki 150 þúsund manna borg. Þingmenn, borgarfulltrúar og allir þeir sem hafa eitthvað um vegakerfi og fjármagn til vegaframkvæmda að segja virðast annað hvort ekki vita þetta eða bara standa á sama. Það er líka greinilega mikilvægara að bora í fjöll úti í rassgati en að koma tugum þúsunda á milli staða á eðlilegum tíma, heildarhagsmunir skipta nefnilega engu máli á Íslandi, aðeins kjördæmapot fyrir litlu og deyjandi kjördæmin úti á landi.

Sigurgeir, drífðu þig að stofna flokk. Ég ætla að vera með og setja það á stefnuskrána að búa til fjóra sterka byggðarkjarna á Íslandi, 1) stór-höfuðborgarsvæðið (svæði sem nær frá Keflavík til Selfoss og Borgarness); 2) Ísafjarðarsvæðið; 3) Akureyrarsvæðið; 4) Egilstaðarsvæðið. Annars staðar verður ekki um neina byggðarstyrki að ræða, einfalt mál.

Hugsið vel um hvar þið kaupið í matinn

2005-08-30T16:40:00.000Z

Sá þetta í dag, maður vissi þetta svo sem, en munurinn er sláandi.

ASÍ 1
ASÍ 2

Svo er það annað, hvernig komst maður af án GSM símans, digital myndavélarinnar og DVD spilarans fyrir nokkrum árum? Ég nota öll þessi þrjú nútímatæki mikið og jafnvel daglega. Nú er þróunin komin á næsta stig, frést hefur af því úti í hinum stóra heimi að verslunarkeðjan Dixon í UK er hætt að selja filmumyndavélar, áður hafði þessi verslunarkeðja hætt sölu á vídeótækjum og kassettutækjum. Plötuspilarar lifa þó enn, spurningin er bara hversu mikið lengur.

Frétt á Sky

Ekki nóg með að Dixon eru hættir sölu á ýmsum raftækjum, heldur ætlar Sony að hætta framleiðslu á venjulegum sjónvarpstækjum (túbusjónvörp (CTR)) og einbeita sér í staðinn að framleiðslu kristalsskjásjónvarpa. Merkilegt...

Frétt á mbl.is

2005-07-27T17:00:00.000Z

Ég hef verið með eindæmum óduglegur að blogga undanfarið, ég sé ekki fram á að það breytist mikið.

Ég fór að fordæmi Sigurgeirs og bjó til Visited Countries map, sniðugt

create your own visited country map
or write about it on the open travel guide

Fer til Danmerkur í frí á sunnudag og verð þar í viku, það er svo til eina sumarfríið sem ég tek í sumar.

Meira seinna

Smá pæling...

2005-06-23T12:05:00.000Z

Af hverju sæta þeir stjórnendur olíufélaganna, sem sátu þegar svindlað var á landsmönnum, ekki ábyrð fyrir glæpsamlegt athæfi? Ég spurði sjálfan mig að þessu í gær og verð bara að viðurkenna að ég átta mig ekki á því hvernig menn geta svindlað svona rækilega á heilli þjóð, stofnunum og fyrirtækjum hennar án þess að þurfa að sæta persónulegri ábyrgð.

Ef við setjum upp smá dæmi, það má vel vera að það sé ýkt en sambærilegt engu að síður. Fyrirtækin Peninga hf, Nískur hf og Aurapúki hf standa í harðri samkeppni. Einn daginn hringir forstjóri Nískur í forstjóra Aurapúka og Peninga og segist vera með hugmynd að því hvernig græða megi án þess að vera í samkeppni. Forstjórarnir þrír hittast á fundi, en það lýsir forstjóri Nískur áætlun sinni. Áætlunin gengur þá út á það að senda hóp ribbalda út á götur landsins, út um allt land. Þeir eiga að ganga á milli og hnupla af fólki nokkra hundraðkalla í viku hverri, en það ákvarðast af hversu hávaxið fólk er hversu miklu er hnuplað. Fyrirtækin hrinda þessari áætlun í framkvæmd, leynilega. Alla grunar að eitthvað misjafnt er á seyði, en enginn virðist geta sannað það, þar til samkeppnisstofnun gerir rassíu hjá fyrirtækjunum. Þar kemur í ljós það sem alla hafði grunað, fyrirtækin lögðu á ráðin um að stela pennigum skipulega af fólki. Samkeppnisstofnun sinnir sinni skyldu og sektar félögin, forstjórarnir sem lögðu á ráðin í upphafi sleppa hins vegar, þrátt fyrir að hafa lagt á ráðin um rán.

Eins og ég sagði, þá er dæmið ýkt. Olíufélögin sendu ekki ribbalda út á göturnar til að ræna fólk, þau voru miklu lúmskari í ránsaðferðum sínum. Ef þau hefðu hins vegar sent ribbaldasveitir út á götur til að hnupla, og það hefði sannast að yfirmenn félaganna hefðu lagt á ráðin um það, þá hefðu yfirmennirnir verði dregnir fyrir rétt og þeir þurft að svara fyrir glæpsamlegt athæfi sitt. Þar sem þeir voru lúmskir og siðlausir í athæfi sínu, en meiddu engan líkamlega, þá sleppa þeir. Þeir sleppa meira að segja svo vel að menn eins og Kristinn Björnsson situr í stjórnum fjölmargra fyrirtækja og græðir penginga á tá og fingri. Ég myndi vilja sjá olíufélögin sækja fyrrverandi forstjóra sína til saka fyrir að hafa misnotað sér það traust sem þeim var veitt og krefjast þess að þeir sæti fangelsisvist fyrir sviksamlegt athæfi. Fyrir þá sem vilja ganga lengst, þá mætti hugsnalega skoða þann möguleika að sækja þá til saka fyrir föðurlandssvik, þ.e. tilraun til að eyðileggja íslenskt viðskiptalíf með gróflegum hætti.

Nóg af þessu bulli, komið að öðrum fréttum. Ég er að fara að hætta hjá Pennanum fljótlega og hef þá störf annars staðar, I can't wait!

Mr. & Mrs. Smith

2005-06-10T01:31:00.000Z

Var að koma af heimsfrumsýningu Mr. & Mrs. Smith. Bjóst við þokkalegri skemmtun og fékk nokkuð góða skemmtun, 3 stjörnur af 4 fyrir skemmtanagildi.

Ég sá ekki Sigurgeir

2005-06-08T14:34:00.000Z

Þetta er svona framhaldsblogg frá fyrri færslu, þar sem ég sagðist hafa séð Sigurgeir en það rigndi svo mikið upp í nefið á honum að hann vildi ekki heilsa mér og þóttist bara vera í eltingaleik. En aftur að málefninu, ég sá ekki Sigurgeir í dag.

pæliði aðeins í'ðí

2005-06-07T14:33:00.000Z

Orðið rafgas, það er nothæft afturábak líka, en þá er það sagraf sem væri væntanlega rafmagnað sag. Veit einhver hvernig rafmagnað sag verður til?

Æ það er svo gaman

2005-06-07T14:29:00.000Z

...að gera eitthvað annað en maður á að vera að gera, eins og að blogga. Bíllinn minn bilaði í gær. Hann tók þvermóðskukast og harðneitaði að fara í gang, sem er verr, því hann er þrælgóður þegar hann fer í gang. Ég reyndi að gefa honum start, en það dugði ekki og á endanum fékk ég tengdapabba bara til að draga mig á verkstæði. Í morgun kom svo í ljós að startarinn var fastur og hafði af þeim sökum brennt jarðtenginuna úr kertunum (eða eitthvað svoleiðis), sem orsakaði að bíllinn vildi ekki í gang. Þetta kostar mig nokkra þúsundkalla :(

Merkileg 'staðreynd'

2005-06-07T14:26:00.000Z

Mér var sagt frá rannsókn sem gerð var í Bretlandi og Kanada fyrir margt löngu síðan og birtist í því eðla tímariti Nútímanum árið 1987. Í þeirri merkilegu rannsókn kom í ljós fylgni milli þess að vera örfhentur og hommi, þ.e. að það er líklegra að hommar séu örfhentir en rétthentir. Hins vegar er ekki þar með sagt að allir örfhentir séu hommar eða að allir hommar eru örfhentir. Bara svona smá fróðleikskorn í tilefni dagsins.

Það er sko nóg að gera

2005-06-07T14:06:00.000Z

Já, það er sko nóg að gera. Ég er að fara að skipta um vinnu, kem nánar að því í bloggi einhvern tíma seinna.

Svo fer að líða að sumarfríi, ég held barasta að það sé í fyrsta skipti sem ég fer í sumarfrí sem vinnandi maður! Svo er bara spurning hvað maður gerir í sumarfríinu. Sem stendur er líklegast að maður skelli sér til Danaveldis að kíkja í Tívolí og Legoland með Bjarka Fannari og Helgu, svo er það alltaf spurning um eins og eitt stykki útilegu þegar tekur að líða á sumarið.

Sjálfrennireið

2005-05-23T12:04:00.000Z

Ég fór á fínustu sjálfrennireið norður um helgina, þess ber að geta að ég kom með sömu sjálfrennireið til baka suður.

Ég mæli með því að Mugison verði sendur í Eurovision á næsta ári.

Ísjakar

2005-05-21T20:53:00.000Z

Ég er núna í Eyjafirði norður í landi. Á leiðinni sá ég tvo ísjaka og hér í Eyjafirðinum hef ég séð nokkra til viðbótar. Ég hef aldrei áður séð ísjaka, þvílík lífsreynsla.

Magnús frændi, til hamingju með stúdentinn.

Meiri trú

2005-05-19T18:29:00.000Z

Kannski best að bæta aðeins við fyrra blogg.

Ég er ekki mjög trúaður, ég trúi þó á gott og illt, en ekki guð og satan. Ég trúi að hið góða og hið illa sé í hverjum manni og hver og einn taki ákvörðun um hvernig hið góða eða slæma sýnir sig, semsagt hið góða og slæma kemur aðeins að innan, ekki að utan (guð/satan). Þess vegna get ég ómögulega fært rök fyrir því að himnaríki eða helvíti séu til. Ég trúi því að hver og einn eigi að lifa eftir sínum eigin lífreglum og hafa að leiðarljósi kærleika og umburðarlyndi.

Þetta er svona kjarninn í minni trú, reyndar þóttist ég vita það að mínar trúarskoðanir væru nær t.d. múslimatrú frekar en kristinni trú, það staðfestist í dag. Hins vegar kemur efsta sætið mér virkilega á óvart...

Trú

2005-05-19T11:51:00.000Z

Ég ákvað að taka próf sem Sigurgeir var með linkað á á blogginu sínu. Þar eru spurðar 50 spurningar sem tengjast trú og trúleysi, en spurningunum er ætlað að svara hvaða trú maður tengist best. Það mætti segja mér að niðurstöðurnar hafi komið verulega á óvart, þær má sjá hér að neðan. Ég hef alltaf talið mig efasemdarmann þegar kemur að trúarkenningum kristinnar trúar, þó ég hafi gengist undir skírn og fermingu. En að ég sé algjörlega á hinum endanum...ja, margt kemur á óvart. Þeir sem hafa áhuga á að kanna trú sína geta gert það hér.

You scored as Satanism. Your beliefs most closely resemble those of Satanism! Before you scream, do a bit of research on it. To be a Satanist, you don't actually have to believe in Satan. Satanism generally focuses upon the spiritual advancement of the self, rather than upon submission to a deity or a set of moral codes. Do some research if you immediately think of the satanic cult stereotype. Your beliefs may also resemble those of earth-based religions such as paganism.

Satanism

83%

atheism

79%

Paganism

63%

Islam

54%

Buddhism

54%

agnosticism

54%

Judaism

50%

Christianity

29%

Hinduism

Which religion is the right one for you? (new version)
created with QuizFarm.com

Ég sá Sigurgeir

2005-04-22T15:14:00.000Z

...í Smáralindinni í gær. Ég sat inni á Pizza Hut að troða mig út af dýrindis flatbökum þegar Sigurgeir röltir fram hjá, hann var ekkert ofsaglaður að sjá mig, veit samt ekki af hverju.

Fyrr um daginn var ég í skírnarveislu hjá hálfbróður mínum, Sveinbirni Frey, en hann var að skíra þriggja mánaða kríli sem hlaut nafnið Björn Magnús, magnað það.

Fyndnast í heimi

2005-04-13T23:38:00.000Z

Um daginn lánaði ég einum símann minn, en viðkomandi þurfti einmitt nauðsynlega að hringja eins og eitt símtal. Félaginn fékk símann, stimplaði númerið inn í rólegheitum og bar tækið svo upp að eyra sér. Hann heyrir að það er svarað og byrjar að babbla eitthvað, áttar sig svo á því að viðmælandinn heyrir eitthvað illa í símanum, talar þá hærra en ekkert batnar. Hann tekur þá símann og lítur á hann, áttar sig ekkert á ástandinu og heldur áfram að reyna að tala, án árangurs. Á meðan var ég í krampakasti, ásamt öllum öðrum sem voru í kring, því drengurinn snéri símanum öfugt, og þrátt fyrir að líta á símann þá áttaði hann sig ekki á því. Þetta var óhugnalega fyndið, og það besta var að viðkomandi gat nú hlegið að þessu eftir á.

Í morgun...

2005-04-06T18:01:00.000Z

...keyrði ég á eftir bíl frá Fagraf á leiðinni í vinnuna, ekkert merkilegt eitt og sér nema hvað Fagraf er Fargaf afturábak, en það orð hefur enga merkingu, það er heldur ekki merkilegt. Áhugavert, ekki satt?

Jibberish

2005-04-05T11:57:00.000Z

Fyrir ekki svo löngu síðan var ég skammaður fyrir bloggleysi og stefni að því að bæta úr, en ég átti einmitt gæludýr þegar ég var yngri. Annars var gaman í skírnarveislunni enda slatti af fólki þar, en hann skoraði 21 stig í gær hann Árni Þór þrátt fyrir að hafa ekki mætt í skírnarveisluna með sinni fjölskyldu. Bíllinn minn þarf að fara í skoðun og ég geri ráð fyrir að panta tíma í dag, ég vona þó að það snjói ekki meira því nú er komið nóg af snjó. Birkir bróðir var búinn að vera á landinu en er núna í París, hann á iPod. Ómar vinur hans er líka flugmaður. En eins og ég var að segja þá skoraði Árni Þór 21 stig í gær, en ég fór mjög seint að sofa eftir leikinn. Pabbi er búinn að vera að flísaleggja bílskúrinn sinn, ég ætlaði að hjálpa honum en hef lítinn tíma haft. Ég hlustaði á Rás 2 um daginn. Einhvern tíma var commentað í commentakerfið, ég versla oftast í Bónus þrátt fyrir það. Takk fyrir mig.

Aftur að blogga...

2005-02-20T03:50:00.000Z

Letin drepur bloggin í tonnatali. Ég hef einfaldlega ekki nennt að blogga frá síðasta bloggi. Skellti mér annars í bíó í kvöld á Meet the Fockers, ágæt mynd en ekki jafn sterk og Meet the Parents. Það er annars búið að vera heldur mikið að gera síðustu vikur í körfunni, margir leikir og margar æfingar og ég á ekki frídag fyrr en 7. mars hið fyrsta, en fram að þeim tíma verður æfing eða leikur á hverjum einasta degi...næstu 15 daga og ég er þegar búinn með 5 daga í beit, þannig að þetta er 20 daga syrpa, þar á meðal undanúrslit (og vonandi úrslit) í unglingaflokki og bikarúrslit í drengjaflokki. Wish me luck!

Skyld'ða vera jólahjól...

2004-12-28T13:03:00.000Z

Þá er maður búinn að éta á sig gat og kominn með ógeð á öllum stórsteikunum, minnsta kosti fram að næstu steik ;)

Ég fékk nokkrar gjafir og er þakklátur fyrir þær allar. Er að lesa The Last Juror þessa dagana eftir John Grisham, snilldarbók, klára hana í kvöld. Svo les maður næst Kleifarvatn, svo The Da Vinci Code og að lokum Bennadollaskjalið. Nóg að gera fram yfir áramót.

Vona að allir hafi annars haft það gott yfir jólin og fari varlega með flugelda á föstudagskvöldið. Ég læt ekkert í mér heyra á þessum vettvangi aftur fyrr en á nýju ári!

Mikill misskilningur

2004-12-23T09:56:00.000Z

Ég vil bara taka það sérstaklega fram að það er mikill misskilningur að skata er góður matur. Vinsamlegast leiðréttið þennan misskilning við þá sem þið þekkið.

Árni og Pálmar (+ family) voru flottir í Mogganum á þriðjudag.

Ég hef sagt það áður, en sé mig samt knúinn til að endurtaka það, Spiderman 2 er vond mynd. Hún er löng og hún er leiðinleg, bara svona til að taka af allan vafa og misskilning, þá bið ég ykkur einnig að leiðrétta þetta við þá sem þið þekkið.

Fatlafól sem þolir ekki auglýsingar og skilur ekki skrítna konu í DV

2004-12-17T13:23:00.000Z

Ég var í smávægilegri aðgerð á miðvikudag, þar sem var verið að fjarlægja ganglera (held að það heiti það í daglegu læknistali), AKA taugarótarbólga. Bólga þessi hafði myndast í úlnlið hægri handar minnar og þurfti skurðaðgerðar við til að fjarlægja hana. Ég ætla nú ekki að fara út í smáatriði, en get sagt að áður en svo aðgerð er framkvæmd, þá er allt blóð tæmt úr höndinni, deyfilyfi sprautað í stað þess (fyllir æðarnar) og svo skorið og fjarlægt. Svo þegar þrýstingurinn sem heldur blóðinu úr höndinni er losaður, þá verður maður töluvert sljór, þar sem einhver hundruð ml af deyfilyfi fara úr höndinni út í blóðrásina. Það var stuð. Nú er ég með umbúðir um hægri hönd og verð orðinn flottur fyrir áramótin!

Það eru tvær auglýsingar sem ég hef séð/heyrt síðustu daga sem eru ekki alveg að virka á mig. Önnur er frá Ora, sem gengur undir nafninu 'Ástríða í matargerð'. Þið verðið bara að fyrirgefa, en matur (stundum niðursoðinn) í dósum er eitthvað sem ég tengi ekki beint við ástríðu. Önnur auglýsing sem ég heyrði í útvarpinu í gær á Útvarpi Sögu, en auglýsingin sú er fyrir Salatbarinn. Þar tekur einvher sig til og setur sig í hlutverk trúbadorsins sem syngur um hitt og þetta, í þessu tilfelli um hvað salatbarinn er ómissandi. Vandamálið er hroðvirknislega unninn texti sem fær mig til að fælast Salatbarinn frekar en hitt. Í textanum er m.a. sungið "Þó ég sé lúbarinn og illa farinn, þá fer ég samt á Salatbarinn". Ef ég færi á Salatbarinn, þá langar mig ekkert sérstaklega að hitta þar fyrir fólk sem lendir í slagsmálum og kemur með opin sár að fá sér salat.

Svo er það eitt sem ég sá í DV um daginn. Þar var frétt um konu sem hafði verið að elta Gunnar í Krossinum vegna þess að hún var að leita að kærleika, sem Gunnari er tíðrætt um. Hún vildi nefnilega líka fá smá kærleika. Gunnar var ekki alveg sáttur við eftirförina, sýndi kærleika sinn í verki og bjallaði í lögregluna í Reykjavíkurumdæmi. Þeim tókst að króa konuna af uppfrá í Breiðholti og hefst þá frásögn konunnar. "Ég sá Gunnar í bílnum við hliðin á mér...", í sömu andrá segist hún hafa orðið vör við blá ljós frá löggunni, við það hafi hún orðið skelkuð og reynt að keyra burt en ekki tekist betur til en svo að hún bakkaði á lögguna!!! Jæja, hún lætur ekki þar við sitja heldur skellir í fyrsta gír og gerir sig líklega til að bruna burt en tekst þá ekki betur til en að hún klessir á annan lögreglubíl, vegna þess að "mér tókst ekki að snúa stýrinu". Lögreglan sakar hana um að hafa keyrt á sig viljandi, meðan tveir lögregluþjónar voru inni í bílnum. Hún svarar því til að hún hafi gert þetta óvart, af hverju ætti hún annars að klessa nýja bílinn sinn? Ég legg áherslu á orðið nýja í samhengi við stýri hér áður. Jafnfram segir hún að hún hafi ekki séð lögregluþjónana inni í bílnum, þar sem hún sjái svo illa! Þá vakna nokkrar spurningar, ef hún sér svona illa, hvernig gat hún veitt Gunnari eftirför? Ef hún sér svona illa, hvernig gat hún séð að Gunnar var í bíl við hliðin á sér rétt áður en hún keyrði á lögregluna? Ef hún sér svona illa, af hverju í andskotanum er manneskjan úti í umferðinni á ökutæki sem hún stýrir sjálf? Well, i dunno?!

Bjarki Fannar er ótrúlegur

2004-12-04T23:38:00.000Z

Drengurinn minn er hreint út sagt ótrúlegur. Hann tók upp á því í morgun að raka aðeins á sér hárið, því honum fannst hann vera með aðeins of mikið hár. Það var allt í lagi og enginn skaði skeður. Svo seinna í dag tók hann upp á því að bæta aðeins um betur, svona þegar enginn var að fylgjast með, og rakaði hann allt af að hluta, en lét annað vera. Þetta þýðir að ég þarf að raka allt af á morgun til að bæta fyrir nýju klippinguna! Ég ætla að reyna að skella inn mynd á morgun af 'ástandinu'.

Óskalisti fyrir jólin

2004-12-03T22:45:00.000Z

Smá óskalisti frá mér fyrir jólin. Listinn er langt frá því að vera endanlegur og gæti tekið einhverjum breytingum fram að jólum.

1. ný gler í gleraugun mín, því þessi gömlu eru orðin svo rispuð

2. Pearl Jam: Rearviewmirror (Greatest Hits 1991-2003), 33 laga diskur með bestu grunge hljómsveit síðustu aldar

3. The Lord of the Ring trílógíuna í eigulegu setti, ekki eitthvað þriggja diska sett þar sem hver mynd er á einum disk, heldur með einhverju myndarlegu aukaefni með þessari allra bestu trílógíu allra tíma, síðasta myndin í seríunni er ekki komin út en mér skilst að hún komi út fyrir jól (c.a. 10. des)
The Fellowship of the Ring
The Two Towers
The Return of the King

4. Playstation 2, leikjatölva sem fæst m.a. í fríhöfninni (ef einhver er að fara til útlanda eða koma frá útlöndum) og í BT

5. Grafarþögn og Kleifarvatn eftir Arnald Indriðason, bækur sem fást í Pennanum-Eymundsson

6. The Last Juror eftir John Grisham, bók sem fæst í Pennanum-Eymundsson

7. Football Manager 2005, tölvuleikur sem fæst m.a. í BT

8. MP3 geislaspilara í bílinn, fæst t.d. í BT á 14.999 kr.

Læt þetta duga að sinni, bæti við listann ef mér dettur eitthvað fleira í hug. Ég set svo link á listann þannig að hægt verði að finna hann efst alveg fram að jólum.

Kristján Jóhanns er dóni Íslands

2004-12-01T20:47:00.000Z

Var að horfa aðeins á Kastljósið áðan, en Kristján Jóhannsson óperusöngvari var m.a. gestur þáttarins. Það er nú meira hvað kallinn þykist vera. Ég hef sjaldan orðið vitni að öðrum eins dónaskap og karlrembu í sjónvarpi, kallinn er ekki viðræðuhæfur greinilega. Svo toppaði hann allt með því að mæta með nýja geisladiskinn sinn og reyndi að plögga hann án þess að KJ eða nýji diskurinn væri umræðuefnið!

Annað, Össur er ei stjórnmálamaður að mínu skapi. Hann nöldrar og nöldrar, það má ekki lækka skatta, það má ekki hækka álögur á brennivín og tóbak og bla bla bla. Ég bíð eftir því að hann leggi nú eitthvað raunverulega til. Ég held að hann myndi vinna sér og flokki sínum inn mjög mörg atkvæði ef hann myndi leggja eitthvað raunverulega til, t.d. við umræður um skattalækkunarfrumvarp ríkistjórnarinnar. Hann gæti t.d. lagt til breytingartillögu, það væri nú tilbreyting. Annars, Össur er ei stjórnmálamaður að mínu skapi.

Skattalækkanir og útsvarshækkanir

2004-11-20T20:06:00.000Z

Ánægður með ríkisstjórnina, ætla að lækka skatta á hinn almenna borgara. Stjórnarandstaðan blaðrar út í eitt hvað þetta er slæmt fyrir hagkerfið og bla bla bla. Sá hins vegar í fréttum á RÚV í kvöld viðtal við formann hagfræðistofnunar HÍ sem talar á öðrum nótum en stjórnarandstaðan, treysti honum betur fyrir þessu en stjórnarandstöðunni. Ég myndi hins vegar vilja sjá breytingarnar koma annars staðar niður að hluta, hækka skattleysismörk í 100.000 krónur og tengja þau neysluverðsvísitölu; afnema heimild lánastofnana til verðbóta á öll lán, eða minnsta kosti takmarka heimildina. Þetta tvennt gæti aukið ráðstöfunartekjur heimila töluvert, sérstaklega verðbæturnar. Nuff said.

Bjarki Fannar kominn heim

2004-11-14T18:13:00.000Z

Ég og Helga sendum Bjarka Fannar í sveitina á þriðjudag, en nú er hann kominn heim þar sem það á að vera skóli á morgun, vona það besta. Bjarki Fannar er svo heppinn að eiga frænku í Fagraskógi í Eyjafirði, en þar býr systir mömmu minnar og hún á stelpu sem er einmitt á sama aldri og Bjarki Fannar. Hann fór einn í sveitina í sumar og aftur núna, engin smá hetja. Svo flaug hann heim í dag, hafði reyndar litlar áhyggjur af því þar sem hann hefur farið að fljúga með Birki bró í rellu.

Annars er það af mér að frétta að ég er að vinna í Pennanum og er að læra inn á hluti. Rúnar, ég er að vinna á húsgagnalagernum við að stjórna samsetningu, útkeyrslu og uppsetningu á skrifstofuhúsgögnum, tók við af Bjarka.

Jójó wossöp

2004-10-30T14:19:00.000Z

Bloggleti dauðans is the thing þessa dagana. Eins og glöggir lesendur hafa tekið eftir þá hef ég ekki bloggað í allnokkurn tíma. Ég vil kenna tímaleysi þar um. Ég ætla hins vegar ekki að hrella viðkvæma lesendur með ellihrörnunarsögum að þessu sinni, heldur að skjóta því að að ég er búinn að skipta um starfsvettvang. The short story, ég er að vinna í Pennanum, the long story...kemur seinna.

Nasahár

2004-10-06T22:35:00.000Z

Eitt af fylgikvillum öldrunar er hárvöxtur á ýmsum stöðum, m.a. í nefi. Ég þoli ekki nasahár og þarf að fara að klippa þau. Veit einhver hvar hægt er að kaupa svona nasaháraklippur?

Topp 10: spennumyndir

2004-10-05T10:01:00.000Z

Þá er það næsti listi, topp 10 spennumyndir. Það getur verið vandkvæðum háð að flokka þessar myndir, sumar eftirfarandi mynda myndu sumir eflaust flokka sem ævintýramyndir eða eitthvað annað, en engu að síður þá lenda þær inn á lista hjá MÉR!

1. Lord of the Rings 1, 2 og 3
2. Pulp Fiction
3. Reservoir Dogs
4. Leon
5. Fight Club
6. The Matrix
7. Apocalypse Now
8. Silence of the Lambs
9. Kill Bill vol.1 og vol.2
10. Se7en

Það komu heil tvö comment á grínmyndalistann, önnur myndin var gjörsamlega stolin úr mér og ætti með réttu að vera á listanum, Office Space, enda algjör snilld. Hin myndin fær ekki meira en honorable mention á listanum.

24 Bond

2004-10-03T23:16:00.000Z

Slátraði fyrstu seríunni af 24, algjör snilld finnst mér. Næst á dagskrá er að ráðast á aðra seríuna og klára hana í þessum mánuði. Ef maður er heppinn, þá nær maður að klára þriðju seríuna fyrir jól.

Bond er töffari. Gaman að því hvernig hann sleppur alltaf ómeiddur úr alls kyns lífsháska gegn ribböldum sem eiga sér engan líkan, t.d. í You Only Live Twice, þá kemst hann í kynni við háskakvendi á snekkju einni. Bond með báðar hendur bundnar fyrir aftan bak tekst að heilla dömuna, eða það lítur þannig út, og fær hana til að losa sig með hníf sem hún ætlaði að 'snyrta' hann með. Í næsta 'scene' eru þau svo í rellu, hún kastar reykbombu á gólfið, festir Bond í gildru og stekkur út með fallhlíf á bakinu. Flugvélin hrapar til jarðar, en Bond nær þó að losa sig fyrst, rétta vélina aðeins af og stökkva svo út áður en hún springur, með hárgreiðsluna flotta og jakkafötin slétt! Hér kemur svo stóra spurningin, af hverju eru ribbaldar í bíómyndum alltaf svona afspyrnuheimskir? Af hverju þurfa þeir alltaf að búa til einhverjar fáránlegar brellur til að drepa aðalsöguhetjuna?

Slappleiki

2004-10-01T13:23:00.000Z

Maður er búinn að vera slappur að blogga undanfarið, veit ekki alveg hvort það verði einhver raunveruleg breyting þar á á næstu dögum...en við sjáum bara til.

Kannski ég skelli inn svona eins og einum topp 10 lista, yfir bestu gamanmyndir allra tíma, það er þó ansi hætt við því að ég gleymi einhverjum myndum á svona lista en þá bæti ég þeim bara við...nota svo commentin til að minna mig á sko!

1. Monty Python's Holy Grail
2. Happy Gilmore
3. Planes, Trains and Automobiles
4. Monty Python's Life of Brian
5. Spaceballs
6. The Pink Panther
7. There's Something About Mary
8. Finding Nemo
9. Caddyshack
10. Set tvær nýjar hér, Dodgeball/Anchorman

Ég geri ráð fyrir að ég hafi gleymt einhverjum myndum, það er þá ykkar að minna mig á!

Hard Rock

2004-09-29T10:24:00.000Z

Bjarki Fannar fékk að velja sér veitingastað í tilefni afmælisins og valdi að fara á Hard Rock. Við fórum þangað í gærkvöldi, fengum okkur ljúffengan mat og Bjarki Fannar fékk svo ís með stjörnuljósi eins og afmælisbörn fá á Hard Rock!

Bjarki Fannar á afmæli!

2004-09-28T01:47:00.000Z

Pjakkurinn er orðinn 6 ára gamall, guð hvað tíminn líður! Til hamingju með daginn Bjarki Fannar.

Ólympíuleikar

2004-09-27T18:18:00.000Z

Síðustu daga hafa ólympíuleikar fatlaðra verið í sjónvarpinu. Persónulega þykir mér það ekki spennandi sjónvarpsefni, en ég ber gríðarlega virðingu fyrir þessu fólki, sem hefur þurft að leggja gríðarlega mikið á sig til þess eins að geta tekið þátt í íþróttum, svo ekki sé talað um að ná árangri. Hins vegar má ekki gera of mikið úr árangri sigurvegaranna, þó hann sé óneitanlega góður. Það vill oft gleymast að í hverri grein eru margir mismunandi fötlunarflokkar, það þýðir t.d. að sá sem vinnur í sundi, getur verið að keppa við alls 20 aðra sundmenn í það heila. Fannst bara nauðsynlegt að koma þessu frá mér...

Skilaboð að....

2004-09-25T13:35:00.000Z

Í vasa mínum er ég með fjórar myntir, tvær tíu króna og tvær hundrað króna. Tíu krónu myntirnar eru slegnar 1987 og 1994 en hundrað krónu myntirnar eru slegnar 1995 og 2001. Er verið að reyna að senda mér einhver skilaboð????

Veikur

2004-09-22T23:26:00.000Z

Ég er veikur, ég þoli ekki að vera veikur. Ég verð mjög sjaldan veikur þannig að ég liggi fyrir, en það stefnir í það núna. Ég get ekki þjálfað á morgun, held ég, það fer í taugarnar á mér að komast ekki á þær æfingar sem ég á að vera með. Ooooooh!

Sniðugt...eða ekki

2004-09-22T13:17:00.000Z

Það hefur vantað allt creativity í mig síðustu daga, kannski vegna þess að það hefur verið mikið að gera og ég hef ekki sofið jafn mikið og ég þyrfti að gera, verð að reyna að bæta úr því. Ég þurfti að fara með bílinn í viðgerð um daginn, djöfulsins rán að eiga bíla. Það er alveg vonlaust að eiga bíl kostnaðarlega séð og það er alveg vonlaust að vera bíllaus, það hef ég reynt. Dammit!

Landsleikur

2004-09-20T10:34:00.000Z

Var á landsleik í gær, Ísland-Rúmenía. Ísland vann að sjálfsögðu, ekki við öðru að búast, og var stemmningin mikil og spennan hæfileg. Áfram Ísland!

Gaupi vitleysingur, íþróttafréttamaður á Stöð 2 og Sýn skeit svo hressilega á sig í kvöldfréttum stöðvar 2, þegar hann greindi frá sigri í landsleik í einni setningu, EINNI SETNINGU!!!! Maðurinn er náttúrulega bara ekki í lagi, en þetta lýsir hans innræti vel, hann er illa innrættur og greinilega algjörlega óhæfur til að starfa sem íþróttafréttamaður, hann er hins vegar vel til þess fallinn að starfa sem handboltafréttamaður. Íþróttir á hann að láta aðra um.